Nangin sentro sang atensyon ang isa ka Hindu nga monghe sa India pagkatapos nga nagpabilin ini nga nagatindog sa sulod sang lima ka tuig bilang kabahin sang iya 12 ka tuig nga debosyon sa diin indi ini magpungko ukon maghigda.
Kalakip si Daulat Giri Ji Maharaj sa sekta nga Khareshwari ukon “Standing Babas,” nga nagapati nga ang sakripisyo ang isa ka pamaagi agud malimpyohan ang kalag kag mapalapit sa ila dios nga si Shiva.
Nagagamit ini sang mga pisi, duyan, kag espesyal nga harness agud magpabilin nga nakatindog bisan nagatulog.
Bangud sa kadugayon, makit-an ang grabe nga paghubag kag paghabok sang iya mga tiil.
Nagpaandam ang mga doktor nga mahimo magtuga ini sang seryoso nga komplikasyon sa ikaayong lawas, kaangay sang deep vein thrombosis ukon blood clotting.
Sa pihak sini, nagapadayon si Maharaj sa iya debosyon sa bulig sang mga naga-boluntaryo sa isa ka lokal nga templo nga naga-atipan sa iya kondisyon.
