Padayon ang monitoring nga ginapatigayon sang Negros Occidental Provincial Veterinary Office sa mga nagasulod sa probinsya agud masiguro nga wala sang makasulod nga pork, pork products kag manok nga infected sang African Swine Fever (ASF) kag bird flu agud maprotektahan ang swine kag poultry industry sang Negros Occidental.
Sa interview sang Bombo Radyo Bacolod kay Negros Occidental Provincial Veterinarian Dr. Placida Lemana, duha ang ginamonitor sang probinsya ang ASF kag bird flu gani indi na magkatingala ang mga tawo nga nagasulod sa probinsya nga tuman ka id-id ang ginahimo nga inspection.
Suno kay Lemana, mas ginapasanyog pa nila ang pagbantay bangud 14 ka mga local government units sa Panay ang apektado sang ASF samtang duha naman ang sa probinsya sang Guimaras.
Sa ulihi nga datos sang Negros Occidental Provincial Veterinary Office nga may petsa nga January 1 tubtob January 8, may yara sila sang nakumpiskar nga 162 kilos sang pork products nga may presyo nga P151, 155.00 kag 20 heads sang piglets nga ginpaship back sa Negros Oriental bangud wala sang nagakaigo nga dokyumento.
Hugot nga ginabantayan sa karun ang mga dalagko nga ports kag airport nga ginalakipan sang Bredco, Banago, Bacolod-Silay airport kag ang mga ports man sa District 4, 3 kag 2 sa probinsya.
Apisar sang madasig nga paglapta sang ASF sa Panay, nagatinguha ang probinsya sang Negros Occidental nga indi masudlan sang infected nga pork kag chicken products sang ASF kag bird flu agud nga mapabilin nga safe sa balatian ang pork kag poultry industry sang probinsya.
