Gindumdum ni Monsignor Felix Pasquin sang Our Lady of Candles Parish ang mga legasiya ni the late Pope Emeritus Benedict XVI kag ginhangkat ang mga Katoliko nga maghimo sang maayo kaangay sang nagtaliwan nga Santo Papa.
Sa interview sang Bombo Radyo kay Monsignor Pasquin, ginpahayag sini nga isa sa mga importante nga legasiya kag ginhimo ni Pope Benedict XVI amu ang paghatag sang insakto nga guide sa pag-interpretar sang Pulong sang Ginoo.
Suno diri, iya gin-emphasize nga sa pag-interpret sang Bibliya, dapat pagtuo ang basehan kag sundon.
Suno pa diri, sang pagpungko ni Benedict bilang Santo Papa, madamo sang natabo sa tunga sang mga Kristiyano kag mga Muslim kun sa diin iya ginchallenge ang mga Muslim nga makighinun-anon.
Suno kay Monsignor Pasquin, maayo man ang anay Pope Emiritus sa mga kanta sang simbahan kag palangga sini ang liturgical music.
Isa man ini sa mga nagdepensa kag nag-apin sa doktrina sang pagtuo ukon doctrine of faith.
Ginalauman ni Pasquin nga mangin santo man si Pope Benedict bangud sang nagtaliwan sadto si Pope John Paul II, nagsinggit man crowd nga siya ang himuon nga santo kag sa madali nga panahon, siya ang gincanonize man.
Nagpanugyan ini sa mga tumuluo nga pangamuyuan ang kapahuwayan sang kalag ni Pope Benedict kag nagpanugyan nga maghimo sang maayo sa kalibutan.
