Nakita na ang ginkawat nga Monstrance nga may balaan nga sakramento sa Adoration Chapel sang San Sebastian Cathedral, Bacolod City.
Kahapon, alas 5:30 sang hapon, nagapadayon ang misa apang hinali lang nga nagdinalagan kag nagkaginamo ang mga tawo sa gwa sang cathedral.
Nakita sang mga nagabaligya sang kandila sa gwa sang simbahan nga may yara sang isa ka lalaki nga nagadalagan bitbit ang monstrance.
Sa interview sang Bombo Radyo kay Justine Arca, Secretary of Commission on Liturgy Diocese of Bacolod, alas 4:00 kaina sang kaagahon, pagbukas nila sang gate sang cathedral, ila nakit-an ang monstrance nga naputos sa itom nga jacket kag puti nga tela.
Suno diri, wala sila sang ideya kun sin-o man ang nagkuha kag nagbalik sang monstrance.
Pahayag ni Arca, kaina matapos ang misa, ila gintunaw kag ginlubong ang blessed sacrament sa hardin sang cathedral.
Plano naman sa karun sang cathedral nga butangan sang CCTV ang area agud malikawan nga maliwat ang ini nga insidente.
Sa karun, temporaryo nga sirado ang Adoration Chapel tubtob nga makadesisyon ang cathedral kun ano ang mahimo.
