UKRAINE – Nagsugod na sa pagdemolish ang Kyiv sang monumento nga nagasimbolo sang historic ties sa tunga sa ex-Soviet Ukraine kag Russia, masobra duha ka bulan matapos gin-invade sang tropa sang Russia ang ila pro-democratic nga kaingod.
Suno sa alkalde sang Kyiv nga si Vitali Klitschko, ila ginahukas ang bronze sculpture sang duha ka mga trabahante nga ginhamtang sa sentro sang capital city sang 1982 nga may tinutuyo kuntani nga ikomemorar ang reunification sang Ukraine kag Russia.
Nagsugod na kahapon suno sa iya ang paghukas sini.
Mas nangin symbolic naman suno kay Klitschko ang ila tikang bangud samtang ginatestingan sang mga ini nga hakwaton ang sculpture gamit ang crane, hinali na lamang nga nadagdag ang ulo sang Russian nga sculpture.
Suno sa alkalde, ang ini nga desisyon ang matapos ang ginhimo sang Moscow nga pagguba sang ila estado kag kalinong sang mga Ukrainian sang sila ang naglunsyar sang invasion sang Pebrero 24.
Suno diri, pagaislan ang pangalan nga nakasulat sa dako nga arch kag butangan ini sang flag sang Ukraine.
Suno sa iya, nagapadayon sa karun ang pagdemolish sang mga otoridad sang 60 ka mga monumento sa capital nga may kaangtanan sa Russia kag Soviet Union.
