Nagpagwa sang Resolution No. 50 series of 2020 ang Regional Inter-agency Task Force against COVID-19 kahapon nga nagaaprubar sa hingyo sang ciudad sang San Carlos kag Victorias nga moratorium sang ila mga locally stranded individuals.
Sa interview sang Bombo Radyo kay San Carlos City Mayor Renato Gustilo, ginkumpirmar sini nga magasugod subong nga adlaw, Oktubre 23 tubtob Nobyembre 3 ang temporary nga pagpauntat sang pagsulod sang mga LSI sa nasambit nga ciudad.
Suno kay Gustilo, ini bangud sa nagasaka nga numero sang local kag active cases sa ciudad kun sa diin may yara sang 94 ka mga aktibo nga kaso as of October 21.
Nagapangabay man ini sa mga pumuluyo nga sundon ang mga health protocols ilabi na ang insakto nga pagsuksok sang face mask kag face shield.
Isa naman ka semana ang moratorium nga ginrequest sang Victorias City sa RIATF nga magasugod man subong nga adlaw tubtob Oktubre 30.
Sa interview sang Bombo Radyo kay Mayor Frederick Wantan Palanca, ginpahayag sini nga madamo ang nagdugang nga kaso sang ciudad bangud isa ka empleyado sa isa ka sugar association ang nagpositibo sa virus subong man ang napulo ka mga persona nga nakaclose contact sini.
Suno kay Palanca, puno naman ang ila mga quarantine centers rason kun ngaa naghingyo ini sang moratorium.
Gindugang man sang alkalde nga mapatuman ini sang duha ka Domingo nga untat byahe sa mga tricycles kag temporaryo nga siraduhan ang mga commercial establishments kag merkado.
Naghingyo man ini sang kooperasyon sang mga pumuluyo agud matapna ang virus sa madasig nga tinion.
