Ginpamilit sang gobernador sang Negros Occidental nga sundon sang probinsya ang guidelines nga ipaidalom ang mga Returning Overseas Filipinos (ROF) sa 14 day facility quarantine kag swab testing sa tion nga magpauli sila sa probinsya.
Sa interview sang Bombo Radyo Bacolod kay Provincial Governor Eugenio Jose “Bong” Lacson, sundon sang probinsya sa gihapon ang national Inter-Agency Task Force (IATF) Resolution No.67 nga tanan nga returning residents sang probinsya ang dapat ipaidalom sa quarantine facility.
Suno kay Lacson, ipadayon man sang probinsya ang pagpatigayon sang swab test.
Ginpahayag man ni Lacson nga may yara sang pila ka mga ROF nga indi na pag-iswab test pag-abot sa probinsya kasunod sang mando sang National Task Force nga indi na sila pag-iswab gani dapat nila ipakita ang resulta nga negatibo na sila halin sa Manila apang kun wala sang may ipakita, magapaidalom sila gihapon sa swab test kag ibutang sa facility quarantine.
Suno kay Lacson, ang mga asymptomatic ang indi naman contagious kun makatapos na ini sang 14 days quarantine.
Madumduman man nga una na nga ginpahayag sang World Health Organization nga ang mga asymptomatic nga Covid-19 patient ang indi makalaton sang virus.
Samtang, ginpahayag man ni Lacson nga wala sang extension ang moratorium sa pagpauli sang mga LSI kag OFWs nga magatakop na subong nga adlaw.
Madumduman nga naghingyo ang provincial government sang moratorium bangud sa mass testing sang Agusto 28 tubtub 31.
Suno kay Lacson, ginabase ang pagpangayo sang moratorium sa availability sang quarantine centers.
