Ginkilala bilang Most Valuable Player sa Volleyball Secondary Girls sa Palarong Pambansa 2026 ang tumandok sang Talisay City, Negros Occidental nga kabahin sang team sang National Capital Region nga amo ang nakakuha sang gold medal.
Sa interview sang Bombo Radyo kay Diza Marie “bambam” Berayo, 18 anyos nga residente sang brgy zone 12-A, Talisay City, Negros Occidental, sang Grade 9 ini nagbyahe siya padulong sa Manila kag didto na nagpadayon sa iya pag-eskwela sa National University Nazareth School (NUNS) halin sa Rafael B. Lacson Memorial High School sa ciudad sang Talisay.
Suno diri, wala pa siya una nadala sa line up sang team apang nagpursige ini sa pag-ensayo.
Suno kay Berayo, sa ila nga pamilya siya lamang ang nagahampang sang volleyball.
Bangod nga ulihi na sini nga Palarong Pambansa, plano sini nga magsulod sa University of Santo Tomas (UST) para mag-eskwela sa kolehiyo.
Dako ang pagpasalamat ni Berayo sa Ginoo, sa iya pamilya kag sa iya coaches kag teammates sa tanan nga suporta nila sa iya.
