Padayon pa ang imbestigasyon sang Bacolod City Police Station 1 angot sa pagtiro patay sa 27-anyos nga amay sa Barangay 13, ciudad sang Bacolod kahapon sang udto.
Madumduman nga ang biktima ang ginkilala kay Nicko Hosain kag residente sa Brgy. 16.
Suno sa mga nakasaksi, sa Baywalk sa Barangay 12 gintiro ang biktima apang nakalakat pa ini tubtub sa Barangay 13 kag natumba sa iskinita.
Sa interview sang Bombo Radyo Bacolod kay Pol. Major Jovil Sedel, station commander sang Police Station 1, ginpahayag sini nga santo sa imbestigasyon sang Police Station 1, sa tangkugo ang igo ni Hosain kag naglapos ini sa iya nga liog.
Ginavalidate pa sang mga ini ang background sang biktima kag ang rason sa pagluthang diri.
Ginpahayag man sini nga sa lugar nga gintumbahan ni Hosain, may yara sang narecover nga pin gun nga ginapag-iyahan man sang biktima.
Ginkompirmar man ni Sedel nga nakaagi na priso ang biktima sa Bureau of Jail Management and Penology (BJMP) sa Barangay Taculing, Bacolod City.
Padayon pa sa karun nga gina-trace ang mga nangin kaso sang biktima.
Suno sa impormasyon nga nakuha ni Sedel, may yara sang utang ang biktima sa druga kag may yara man sang pagpamahog apang ginavalidate pa sa karun sang otoridad.
Ginapadalman man sang Police Station 1 ang rason sa likod sa pagpatay kay Hosain kag ginatsekyar pa sa karun kun nakaagi man surrender sa nasambit nga estasyon.
Ipadalum pa sa paraffin test kag autopsy ang biktima agud matumod ang sahi sang armas nga gingamit sa pagpatay diri.
Ginapangita man sa karun ang apat ka iban pa nga kaupod sini antes magluntad ang krimen.
