Ginaimbestigaran pa sang mga pulis sa ciudad sang Silay kun ano ang motibo sa pagpatay sa ginapahayag miyembro sang Epogon robbery group nga ginpatay sa Hacienda Malinao, Barangay E. Lopez kagab-i.
Nahibaluan nga ang biktima nga si Arnold Rivera, 48-anyos ang tumandok sang Hacienda Pula apang siya ang ginpatay sa Hacienda Malinao samtang papauli na sakay sa motorsiklo kaupod ang misis kag anak nagikan sa kampo sang tubo.
Sa interview sang Bombo Radyo sa misis ni Rivera nga si Marilyn, nagikan sila sa pagtanom sang patdan kag pauli na sa ila balay alas-5:40 sang hapon kaupod ang 11-anyos nga anak nga babayi.
Pag-abot sa Hacienda Malinao, may nalabayan sila nga duha ka motorsiklo nga nagapundo sa magtimbang nga bahin sang dalan kag may tag-isa ka lalaki nga nagasakay.
Pag-abot sa unhan suno kay Marilyn, may puti nga awto nga nagbalabag sa dalan gani ginpapundo sang iya mister ang motorsiklo.
Didto na kag nagpalapit sa ila ang duha ka lalaki nga nagikan sa duha ka motorsiklo kag ginsagnoy si Arnold.
Nagduko ang biktima apang gintiklod ini sang suspetsado kag sang siya ang nag-mumo, gin-nunuan ini sang armas sa dulunggan kag gintiro.
Sang naghapa na si Arnold suno sa tiayon, gintiro pa gid ini sang suspetsado sa likod.
Suno kay Police Lt. Guilmore Cuare, isa ka fired cartridge sang M16 rifle kag isa man ka empty shell sang caliber .45 pistol ang narekober sa crime scene.
Suno kay Cuare, padayon pa ang imbestigasyon agud matumod kun ano ang motibo sa krimen.
