Patay ang motorcycle rider matapos nga makabunggo sa ginatangkas nga bato sa higad sang dalan sa syudad sang Bago, Negros Occidental kagab-i.
Sa interview sang Bombo Radyo Bacolod kay Police Chief Master Sergeant Celso Omega, deputy chief sang Bago City Police Station, ang biktima nga ginkilala kay John Rey Pronda, 21 anyos, kasado kag residente sang Proper Crossing, Pulupandan, Negros Occidental ang nagabiyahe north to south direksyon bangud mapauli na sakay sa Kawasaki Baja nga motorsiklo sang ini ang nakabunggo sa National Highway sang kilometrahe 15, Barangay Calumangan, Bago City.
Gindala pa ang biktima sa Bago City Hospital apang gindeklarar nga dead on arrival sang attending physician bangud sa patal nga mga pilas sa ulo.
Suno kay Omega, wala sang kontra ang motorsiklo kag self-inflicted ang natabo nga aksidente.
Nagalaom man ini nga mabutangan na sang street lights ang dalan bangud madulom ini kag masami ginaluntaran sang aksidente.
Nagpanugyan man si Omega nga maghalong kag magsuksok sang protected gear kaangay sang full-faced nga helmet kag magpangamuyo ilabi na sa tion sang pagbiyahe.
