Dead on the spot ang isa ka motorcycle rider matapos nakabunggo sa isa ka pribado nga salakyan sa Purok Manihan, Barangay Bunga, Don Salvador Benedicto, Lunes sang hapon.
Sa interview sang Bombo Radyo kay Police Staff Sergeant Ryan Rigor, traffic investigator sang Don Salvador Benedictor Municipal Police Station, papauli na kuntani si Andy Caranay, legal ang edad kag residente sang Igmayaan sakay sa iya motorsiklo sang nag-overtake ini sa nauna nga motorsiklo.
Bangud sa madasig nga pagpadalagan kag ginaalegar napaidalum sa impluwensya sang makahulubog nga ilimnon, nalab-ot sini ang pihak nga lane kag naghead on collision sa Toyota Avanza nga ginamaneho ni Judy Cañedo, 40-anyos kag residente sang Talisay City, Negros Occidental.
Kaupod ni Cañedo sa salakyan ang apat ka mga miyembro sang iya pamilya.
Bangud sa makusog nga impact, nagtabog kag nadulaan gid sang kabuhi si Caranay samtang nakaagum naman sang gamay nga samad ang mga pasahero sang Toyota Avanza.
Suno kay Rigor, nagsettle naman ang duha ka bahin.
