Patay ang isa ka driver sang motorsiklo samtang pilason naman ang angkas sini matapos mabungguan sang Honda Wave nga motorsiklo sa Purok Sambag, Barangay Abuanan, Bago City, Negros Occidental kagab-i, Disyembre 1, 2025.
Sa impormasyon nga nakuha sang Bombo Radyo News Team, ang Honda Wave ang ginamaneho ni “Anthony”, may live-in partner kag residente sang Purok Sambag, Barangay Abuanan, Bago City, Negros Occidental.
Samtang ang Rusi Surf 110CC nga motorsiklo ang ginamaneho ni alyas ” Kristoper”, 48-anyos, kasado kag electrician angkas sini si Alyas” Paul”, 22-anyos, wala sang asawa, welder kag lunsay residente sang Purok Kapahu-an, Barangay Mailum, Bago City.
Suno sa report, samtang nagabiyahe si Anthony halin sa Barangay Ma-ao padulong sa Barangay Abuanan aksidente nga nabungguan ang Rusi Surf.
Ang duha ka driver kag ang angkas sini ang lunsay nga naka-angkon sang pilas sa pila ka bahin sang lawas.
Gilayon nga gindala ang mga ini sa Bago City Hospital para sa nagaka-igo nga pagbulong.
Apang si alyas” Kristoper” ang gindeklarar nga dead on arrival.
Ang duha ka motorsiklo ang yara sa Bago City Police Station para sa nagakaigo nga disposisyon.
