-- ADVERTISEMENT --

Patay ang driver sang motorsiklo matapos magbunggu-anay sa isa ka pickup truck sa Murcia-Mansilingan Road, Bacolod City alas-11:26 kagab-i.

Ang napatay ang ginkilala nga si Dave Vincent Porque, 21 anyos, single, residenye sang Purok Masinadyahon, Florence Ville, Brgy. Pahanocoy, Bacolod City nga nagadala sang Raider 150 nga motorsiklo; samtang si Juan Carlos Martir, 29 anyos, residente sang Lolita Heights Subdivision, Brgy. Mansilingan, Bacolod City naman ang nagadala sang Nissan Navarra.

Sa interview sang Bombo Radyo Bacolod kay Police Major Elmer Bonilla, head sang Traffic Management Unit sang Bacolod City Police Office, ang motorsiklo nga nagahusoy sa Murcia Road padulong sa Brgy Mansilingan, samtang sugata naman sini ang pickup truck nga padulong naman sa banwa sang Murcia.

Gintinguhaan pa sang first responder nga masalbar ang biktima, apang ini ang gindeklarar nga dead on arrival pagdangat sa ospital.

Sa karun, nagatipon pa sang CCTV footage sa palibot nga area agud matumod kun sin-o ang nanglaksam sang lane.

-- ADVERTISEMENT --

Ang driver sang pick-up ang yara sa karun nakahunong sa Bacolod Police Station 7, kag nagpadulong naman sa estasyon ang pamilya sang napatay.

Wala pa mahibaluan kun ang mga ini ang nagpasugot sa settlement ukon magapasaka sang kaso sa driver.

Wala man mahibaluan kun may-ara sang naka-inom sang makahulubog nga ilimnon sa duha ka driver.

Panawagan nalang ni Bonilla sa mga motorista nga maghalong sa byahe kag magpangaman.