Luwas na sa katalagman ang biktima sang shooting incident sa Purok Pinya, Barangay Bunga, banwa sang Salvador Benedicto, Negros Occidental.
Sa interview sang Bombo Radyo Bacolod kay Police Captain Ignacio Javier, Deputy Chief of Police sang Don Salvador Benedicto Municipal Police Station, ang biktima ang ginkilala kay Simplicio Diso, 44 anyos kag residente sang nasambit nga lugar.
Suno kay Javier nagabiyahe sakay sa motorsiklo ang biktima kag nakibot nalang nga gintiro ini.
Nakaagom sang igo sang bala sa magkatuhay nga bahin sang lawas.
Gindala sa rural health unit sang banwa antes ginsaylo sa regional hospital sa ciudad sang Bacolod agud nga madapatan sang pagbulong.
Maayo na ang kahimtangan sang biktima kag makahambal naman.
Nagapadayon sa karun ang imbestigasyon sang mga kapulisan sa insidente agud nga matumod kun pila ang suspek kag ang motibo sa pagtiro sa biktima.
