Nagapabilin pa sa ospital ang Criminology student sa banwa sang Pontevedra nga gintiro sang hubog nga pulis nga nakatiro man sa banwa sang Hinigaran sang ginbuligan nila kuntani nga makatakas sa kanal matapos maaksidente sa motorsiklo, Martes sang gab-i.
Nahibaluan nga naaksidente si Police Corporal Romnick Ace Pacificar sa Barangay MH del Pilar samtang nga nagapalagyo matapos niya gintiro si Jinmar Baya sang Barangay Gargato, Hinigaran.
Ang kurbada nga dalan sa diin naaksidente si Pacificar ang nahamtang sa atubang sang balay ni Billy Mindanao gani gilayon ini nga nagtabang sa pulis apang siya ang gintiro sa kamot.
Nakalabay man ang Criminology student nga si Aldwin Provido gani nagpundo man ini agud nga magbulig, kaupod ang iya angkas.
Sang hana na nga magbiya si Provido sa lugar, gintiro ini sang pulis kag siya ang naigo sa likod, samtang nakalikaw naman ang angkas sini.
Suno sa utod ni Billy nga si Rodalyn Mindanao-Secoral, nakainom ang pulis.
Nagbulig man kuntani ang bana kag anak ni Secoral apang nagdalagan ang mga ini sang nakit-an nila nga may armas si pulis gani wala sila nadalahig.
Sa karon, ginabulong sa Bacolod South General Hospital si Provido.
