Pilason ang isa ka lalaki matapos aksidente nga naglupok ang armas-luthang sa iya bag sang Disyembre 29, sa ciudad sang Bacolod.
Sa interview sang Bombo Radyo Bacolod kay Police Captain Francis Depasucat, station commander sang Bacolod City Police Station 1, ang biktima ang nagasakay sa motorsiklo kaupod ang iya abyan sang may nakontra ini nga isa man ka motorista sa bahin sang Negros Occidental Provincial Capitol lagoon.
Suno diri, nanaog ang bitkima sa motorsiklo kag naglupok ang armas-luthang sa sulod sang iya bag.
Siya ang nag-agom sang pilas sa paa.
Suno kay Depasucat, una nga naghambal ang biktima nga siya naigo sang stray bullet apang may nakawitness sa natabo nga nagsugid nga self-inflicted incident ang natabo.
Sa karun, ginapangita pa kun diin ang kaupod nga abyan sang biktima kag ang motorsiklo nga ginsakyan sini.
