Pilason ang isa ka lalaki matapos ginhabuyan sang butilya kag bato sa Economic High Way sa may bahin sang EB Magalona kahapon, Mayo 15.
Sa interview kay Rollyn Aligarbes, ang motor rider nga napilasan, papauli na ini kuntani sila nga duha sang iya hinablos sa ciudad sang Victorias naggikan sa ciudad sang Bacolod pasado alas-12:00 sang kaagahon sang hinali na lang ini ginhaboy sang botilya kag bato samtang nagabyahe sa dalanon.
Suno kay Aligarbes, wala na ini nagpundo pa apisar nakabatyag sang sakit bangud nagapinsar ini nga basi damo ang nagabantay sa dulom nga bahin sang dalan kag sila ang mabutang pa sa katalagman.
Suno diri, kun wala ini sang helmet, mahimo mawasak ang iya nga ulo bangud sa impact sang bato kag botilya.
Sa ila nga pagpauli sa ila puluy-an, didto na natukiban ni Aligarbes nga nakaagom siya sang mga pilas sa lawas, sa bahin sang iya nga abaga.
Sa karun, sila ang mapadulong na sa city health agud magpacheck-up kag madapatan sang nagakaigo nga pagbulong ilabi na sang Anti-tetanus.
