(Update) BACOLOD CITY — Ginpamilit sang iloy sang Grade 8 student sa Ramon Torres National High School sa ciudad sang Bago nga ginpakahuy-an sa eskwelahan ang iya anak rason nga ini ang naghikog sang Oktubre 9.
Una na nga ginpamilit sang Department of Education Division of Bago City nga wala gindala sa Bago City Police Station si Eric Demafeliz agud nga ipa-blotter tuhoy sa nadula nga iPad sang iya classmate kundi naghingyo sang police escort nga maestra nga si Larina Peruelo para sa entrapment operation.
Sa interview sang Bombo Radyo, ginpahayag sang iloy nga si Warlina Demafeliz sang Barangay Napoles nga hustisya ang iya ginapangita sa kamatayon sang 15-anyos nga anak.
Luyag sini nga madisiplina ang adviser sang iya bata agud indi na ini masulit pa sa iban.
Panindugan sini, nahuy-an sa eskwelahan ang iya anak matapos gin-anunsyar sa flag-raising ceremony nga nagpangawat si Eric kag ginhabuyan pa sang malain nga tinaga.
Aminado si Mrs. Demafeliz nga wala nakapanugid sa iya si Eric may kaangtanan sa problema sini kag naabtan na lamang sini sa morge nga bangkay na ang iya anak.
Ginkumpirmar man sini nga nagkadto sa ila balay ang mga opisyal sang division office sang ginahamyang pa ang iya anak apang wala man sila nagtanyag nga buligan ini kasunod sang kamatayon sang estudyante.
