Ginkumpirmar ni Mrs Portia Familiaran, asawa ni outgoing Bacolod City Vice Mayor El Cid Familiaran nga plano sini kuntani nga kay-uhon ang mga tanom sa kilid sang dalan sa gwa sang Bacolod City Government Center kaangay sa nakaandan sini nga ginahimo.
Sa interview sang Bombo Radyo Bacolod kay Mrs Familiaran, gin-ayo siya duha ka tuig na ang nakaligad ni Bacolod City Mayor Alfredo “Albee” Benitez, nga mabutangan sang tanom ang kilid sang perimeter fense agud magtahom.
Sa pagbanta sini, masobra milyon ang balor sang tanan nga pananom, kag wala sang bisan singko nga gingastos ang ciudad.
Mga personnel man sini ang naga-atipan sa mga tanom kag kun may makita nga patay ukon nagakalayong na, gilayon nga ginakuha kag gina-islan.
Panindugan ni Mrs Familiaran nga ini ang public knowledge na partikular na sa mga nagatrabaho sa BCGC.
Suno diri, sa tion nga tuman ka init sang tiyempo, kada semana man ini nagapadala sang truck sang tubig agud ang mga ini ang mabunyagan.
Aminado si Mrs Portia nga napabay-an ang tanom sa tion sang eleksyon bangod sila ang nangin masako.
Paathag sini nga may mga nabilin nga inadlaw pa si Vice Mayor El Cid Familiaran sa iya pwesto, gani samtang may-ara pa sang tion, luyag kuntani sini nga mare-arrange ang mga pananom bangod madamo na sang nalayong ukon napatay.
Ini ang rasun nga siya ang nagpadala sang tawo agud maghakot sang mga patay na ukon indi na maayo nga tanom agud iya ma-islan sang bag-o.
Natingala man ini kun ngaa nangin isyu ang iya ginhimo bangod humalin sang nag-ayo ang alkalde sa iya, siya man ang nag-atipan sa pananom nga wala sang assistance sang city government.
Dugang pa sini nga ginapost man sini sa social media ang pag-atipan sang mga tanom gani ini ang nahibaluan na sang kadam-an.
Paathag sini nga wala man sang deed of donation gani indi iya sang ciudad ang mga tanom.
Apang apisar sini, wala siya sang plano nga bawion ang iya ginpangtanom bangod siya ang may-ara sang 1,000 square meters nga mga pananom.
Plano sini nga ipabilin ang mga tanom, apang aminado ini nga magalain ang iya buot kun makita nga ini ang napabay-an.
