Kadungan sang selebrasyon sang ika-500 nga annibersaryo sang Kristiyanismo sa Pilipinas, ginpadumdum ni Msgr. Felix Pasquin sang Our Lady of Candles Parish sa mga Filipino ang kaayo sang Ginoo apisar sang mga indi maayo nga nahimo sang mga tawo sa nagligad nga 500 ka tuig.
Sa homily ni Msgr. Pasquin kaina sang aga, ginpaanggid sini ang mga pumuluyo sa mga Israelita sa tion ni Moises nga nagapanglakaton padulong sa lugar nga ginpromisa sang Diyos kun sa diin madamo ang nangluya kag nadulaan sang pagsalig sa Ginoo.
Madamo sa ila ang napatay apang ang Diyos ang nagpabilin nga maluluy-on kag mapinalanggaon.
Suno kay Msgr. Pasquin, sa nagligad nga 500 ka tuig, madamo sang nahimo nga sala ang mga tawo, may mga kalamidad, pinatyanay kag kaimulon sa pungsod.
Apisar sang sini nga kahimtangan, suno sa iya, maluluy-on kag mapinalanggaon ang Ginoo kag indi sini pagpabay-an ang Pilipinas kag mga tawo.
Suno diri, bangunon Niya ang krus agud ang mga tawo ang magtangla sa Ginoo nga may pagtuo kag makaangkon sang kabuhi nga wala sang katapusan.
Ginpadumdum man sini nga ang Diyos ang nagpadala sang Iya Anak indi agud silutan ang kalibiutan kundi agud luwasan ang mga tawo.
Suno diri, apisar nga nagakatumba ang mga Kristiyano bangud sa sala, ang paglaom ang magapatindog liwat sa tagsa-tagsa kag magapasandig sa kalipay nga nasanto sa kamatuoran nga palangga kita sang Ginoo.
