Msgr. Felix Pasquin, nagpanawagan sa mga ginikanan nga suguran sa balay ang pagtudlo sa mga kabataan sang Christianity

Kadungan sang 5^th centenary celebrations sang Kristiyanismo sa Pilipinas subong nga tuig, nagpanawagan si Msgr. Felix Pasquin sang Our Lady of Candles Parish sa mga ginikanan nga suguran sa panimalay ang pagtudlo sang Kristiyanismo.

Suno kay Pasquin, dako ang papel sang mga ginikanan ukon mga lolo kag lola sa pagtudlo sa mga kabataan nga mangin Kristiyano kag ini ang pagasal-on lang sang mga parokya.

Ang 500^th anniversary sang Christianity sa Pilipinas subong nga 2021 suno kay Pasquin ang kuntani magaserbe nga pamukaw sa mga ginikanan nga sila ang dapat mauna sa pagtudlo sa mga kabataan sang hugot nga pagtuo sa Diyos kag maayo nga binuhatan nga ila madala tubtub sa pagdako ilabi na sa karon nga madamo ang impluwensya sa palibot.

Suno kay Pasquin, dako ang obligasyon sang mga ginikanan nga indi nila dapat pag-untatan bangud wala man nagapahuway si Satanas sa pagtanom sang binhi sang kalainan kag pagpalayo sa tawo sa Diyos.

Kadungan sang tema sang selebrasyon nga “GIFTED TO GIVE” suno sa pari, ginahangkat ang tanan nga hugton pa gid ang paghigugma sa Diyos paagi sa paghugot sang paghigugma sa isa kag isa.

Ang isa ka tuig nga selebrasyon ang magatakop sa Abril 18 tubtub 22 tuig 2022 nga magadungan naman sa 2^nd National Mission Congress sa Cebu City.