Ginbawian sang kabuhi ang isa ka multi-millionaire nga nagapanag-iya sang isa ka ubasan naggikan sa California matapos gintapak-tapakan sang grupo sang mga elepante samtang nagapatigayon ini sang hunting expedition sa Gabon, Central Africa.
Ginkilala ang biktima nga si Ernie Dosio, 75-anyos, isa ka hunter sang yellow-backed duiker, isa ka sahi sang Antelope nga makita sa Lope-Okanda rainforest.
Natabo ang insidente sang tinalikdan nga Abril 17 kun sa diin indi hungod nga masugata ni Dosio kag sang iya personal guide ang grupo sang lima ka babayi nga elepante kaupod ang isa ka baboy, nga gilayon nagpang-atake matapos makabatyag sang pamahog ukon threat.
Ginkumpirmar sang isa ka Safari operator sa Africa ang pagtaliwan sang hunter.
Suno sa kapareho nga hunter, madugay na nga nagapang-hunt si Dosio kag nagasunod gid ini sa mga pagsulondan sang Hunting regulations sa U.S. kag Africa.
Ginapatihan nga nakibot lamang ang mga elepante gani nagpang-atake ini bilang depensa.
Nahibaluan nga si Dosio ang nagapanag-iya sang Pacific AgriLands Inc., isa ka kompaniya sang vineyard sa Modesto, California nga may kalaparon nga 12,000 hectares.
