Aga pa sang kalibutan kaina sang nagbungguanay ang isa ka multicab kag auto sa 27th Lacson St. Brgy. Mandalagan ciudad sang Bacolod.
Pasado alas-7:00 sang aga sang naatrasar diutay ang dalagan sang trapiko sa lugar matapos nagbungguanay ang multicab nga ginamaneho ni Shiela Palomares, sang Brgy. Mansilingan, Bacolod kag isa ka lalaki nga wala pa natumod ang ngalan.
Nagahilibion si Palomares nga ginakumpruntar ang drayber sang auto bangud sang tuman nga kasakit kag kakulba nga nabatyagan matapos ang aksidente kun sa diin upod pa sini ang iya 12-anyos nga bata.
Gikan sa sur nga direksyon ang multicab samtang sugatan naman sini ang auto nga gikan sa norte.
Pareho nga wasak kag gupi ang atubangan sang duha ka salakyan bangud sang impact sang bungguanay.
Suno kay Palomares, yara siya sa husto nga linya apang ginsugata ini sang auto nga madasig ang dalagan.
Sang gin-interview sang Bombo News Team ang driver sang auto, halos indi ini makahambal kag indi man magsabat kun hubog ini apang may nakita nga botelya sang vodka sa iya salakyan.
Bangud sang tuman nga kaakig napatup-an pa sang tapungol ni Palomares ang lalaki.
Magluwas sa duha ka mga salakyan, nakabunggo man sa buli sang multicab ang duha ka motorsiklo nga nagasunod kay Palomares.
