Ginkompirmar sang alkalde sang Manapla, Negros Occidental nga nagpositibo sa COVID 19 ang medical health officer sang banwa, santo sa resulta sang laboratory test nga naggwa kahapon.
Sa interview sang Bombo Radyo Bacolod kay Mayor Manuel “Manolet” Escalante, ang nagpositibo nga doctor ang masami nga nagapadulong sa syudad sang Bacolod agud magsimba sa simbahan sang mga protestante kag nagapati ini nga sa Bacolod ini natapikan sang virus.
Suno kay Escalante, ginlockdown ang examination room kag opisina sang doctor para sa disinfection.
Padayon naman ang pag-operate sang maternity, therapy and dental units nga makit-an sa Rural Health Unit building.
Ginpahayag man ni Escalante nga 40 ka mga residente kalakip na ang 24 ka mga Rural Health Unit personnel ang nacontact trace na kag ginpaidalom sa swab testing kag ginbutang na sa quarantine facility.
Suno kay Escalante, nakabatyag sang paglain sang pamatyag ang doctor sang tinalikdan nga semana gani ginpaidalom sa swab test kag wala na nagbalik sa pagtrabaho.
Naggwa kahapon sang hapon ang test result sini nga positibo.
Ginpasiguro man sini nga handa ang banwa sa pagresponde sa mga emerhensya apisar nga nagapaidalom sa quarantine ang municipal doctor bangud ginmobilize sini ang mga midwives sang banwa.
Suno sa alkalde, tatlo nalang kuntani ang ginaquarantine sa banwa apang nadismaya ini matapos nga madugangan bangud sa gincontact trace ang close contacts sang nagpositibo nga doctor.
Ginpahayag man sini nga ginahatagan niya sang pagtamod ang mga healthcare workers sang banwa.
Nagpanawagan man ini sa mga pumuluyo sang paghangop kag pagsunod sa mga protocol.
