Ginahulat nalang nga matapos agud ma-unveil ang ginakabig nga pinakamalaba nga mural painting sa ciudad sang Bacolod.
Sa interview sang Bombo Radyo Bacolod kay Armando Guevarra, Business Manager sang Davies paint, nakita sang mga ini ang dingding nga bakante kag nanugunan ang mga ini kag ginavandalize lang.
Suno kay Guevarra, bangud sini nakapanumdom siya nga butangan nalang sang mural painting ang bakante kag ginavandalize nga dingding kag natabuan man nga ginaselebrar sang ciudad ang Masskara Festival 2024.
Agud nga matigayon nagtie-up sila sa mga artists kag volunteers agud nga mapatigayon sang mural painting kun sa diin ang Davies paint ang gingamit sang mga artists.
Suno diri, ang mural painting ang effort sang mga artists.
Ang mural painting ang may kalabaon nga 150 meters ukon 450 ft.
Suno kay Guevarra mahimo nga ang nasambit nga mural ang pinakamalaba nga makita sa Mabini sa ciudad sang Bacolod.
Ginbululigan sang kapin 70 ka mga artists kag volunteers agud nga matigayon ang mural painting kag ginabanta tatlo ka adlaw antes matapos.
Gintig-uluhan naman ang mural painting sang Bacolod Wall Story bangud indi lang ini drawing ukon ginpintahan ang dingding kundi ang tanan nga makita nga drawing ang may estorya kag ang dingding mismo ang may history ukon mau kasaysayan.
Pila sa makita nga estorya sa mural painting ang pagluntad sang sugar crisis sadto sa ciudad sang Bacolod kag ang pagkalunod sang barko nga Don Juan kun sa diin nagwa ang Masskara Festival.
Suno pa kay Guevarra, santo sa pahayag sang artists nga si Charlie Co ang nasambit nga mural painting ang napahayag sang slices of life sang mga Bacolodnon kasubong man sang Negrosanon.
Ang nasambit nga artists ang isa man sa nagpinta sa mural painting sa Mabini kag siya lamang ang makalaragway kun ano ang ginpinta sini.
Gin-estoryahan man sang mga artists kag volunteers ang pagplastar sang estorya nga ibutang sa mural painting.
Ang project orange ang nag-upod sa nasambit nga kumpaniya agud nga madihon kag matigayon ang proyekto.
Natalana nga matapos ang painting subong nga adlaw, Lunes kag karun sa hapon ang unveiling sini.
Nagpangagda man si Guevarra sa mga Bacolodnon kasubong man sa mga bisita nga bisitahan ang mural painting sa Mabini St agud nga makita man ang gin-ubra sang mga Bacolodnon kag Negrosanon artists.
