Nagapanawagan ang overseas Filipino worker sa Saudi Arabia sang bulig nagikan sa gobyerno agud makapauli na ini sa Pilipinas matapos ginpriso sang iya nga amo.
Sa interview sang Bombo Radyo kay Mikoh Cruz La Del, tumandok sang Murcia, Negros Occidental, apat ka bulan pa lamang ini nga nagatrabaho sa iya employer sa Saudi Arabia kag sang Sabado, nagpost ini sang video sa Facebook matapos siya ang ginpriso sang iya amo agud magpangayo sang bulig.
Suno kay La Del, ang iya amo ang isa ka senior citizen nga babaye kag may lima ka mga kabataan nga upod sa ila balay.
Sadto, maayo pa ang pagtratar sa iya apang sang nagdugay, ginpasaylo ini sa storage room kag kun kaisa sa hagdanan na lamang nagatulog.
Suno sa iya, wala ini sang day-off kag siya ang ginapatinlo man sa balay sang utod sang iya amo.
Bangud diri, siya ang nagreport sa iya ahensya kun sa diin nagpasugot man sadto ang iya employer nga indi na ini pagliwaton.
Apang sang tinalikdan nga semana, liwat ini nga ginsugo nga maninlo sa balay sang utod sang iya employer apang wala ini nagpasugot.
Bangud diri, naglalisay si La Del kag ang iya amo kag siya ang ginpriso sa third floor.
Tuman ang paghilibion sini sa video matapos siya ang ginpagwa kag iya ini gin-upload sa social media, nga gintunaan naman sang pagpangayo sang bulig sang iya pamilya sa Overseas Workers Welfare Administration.
Nagpakig-angot ang OWWA sa iya employer kag sa iya agency kag siya ang natigayon nga narescue kag yara sa karun sa kustodiya sang iya ahensya.
Suno diri, siya ang nagahulat na lamang sang mga dokumento agud siya ang makapauli sa Pilipinas kag wala na sang plano nga magbalik pa sa iya amo.
Suno sa OFW, madamo sang mga Filipino ang nakaagom sang kabudlayan sa ila mga employers sa Saudi kag sang damlag lang, may ginrescue man nga ginkalbo kag ginsulod sa washing machine.
Panawagan sini sa gobyerno nga siya ang mabuligan nga makapauli ini gilayon pabalik sa Pilipinas kag mahatagan man sang nagakaigo nga assistance.
