Para sa mga Muslim, ang fasting ang ginakabig nga pagpanghangkat sa mga tumuluo bangud diri ginatestingan ang ila pagtuo sa Diyos.
Sa pagpadulong sang Bombo News Team sa Abu Bakr Al Siddiq diri sa Bacolod City, ginpakigbahin ni Brother Rasheed Espinosa ang importansya sang Ramadan para sa mga Muslim.
Suno kay Espinosa, ang fasting ang isa ka trial sa mga believers kag diri ginatestingan ang pagtuo sang mga Muslim sa Diyos.
Suno sa iya, ini ang nagapakita lamang nga kun pwede man lang nga malikawan ang paghimo sang sala, dapat ini ang likawan bangud masarangan man sang mga ini ang paglikaw sang pagkaon kag tubig.
Suno diri, ang Ramadan ang ginapaabot sang tanan nga Muslim kun sa diin sila ang wala nagakaon, naga-inom kag nagapakighilawas.
Nagasugod ang ila fasting sa pagsugod man sang pagpangamuyo kag pwede lamang sila makakaon kun gab-i.
Ini ang pinakamataas nga sahi sang pagsimba sang mga Muslim kag ginatawag nga “secret sacrifice” bangud wala nakahibalo ang mga tawo nga sila ang nagafasting kag wala nila ini ginapakita-kita.
Ginalikawan man ang pagpamuyayaw, pagpanglibak, pagpanahor kag tanan nga illegal activities.
Suno kay Espinosa, may ginpadala nga Dates ang ila mga brother nga Muslim nagikan sa Saudi kun sa diin ini ang mataas sa nutrisyon kag makasustain sa gutom hulaim sa aga asta maghapon.
Antes paman magsugod ang pagpangamuyo, dapat sila ang nakakaon na kag suno sa iya, mas maayo kun Dates ang ila kaunon agud magasustiner sa ila.
Excused naman sa fasting ang mga nagamasakit, bag-o bata, nagabreastfeed kag yara ang menstruation apang ila ini pagabayaran ukon sila ang magabawi pagkasunod nga bulan.
Sa karun, ginapahanugutan na sa ila ang pagtililipon bangud natapos naman ang COVID-19 pandemic.
