Patay ang isa ka ginaalegar miyembro sang Special Partisan Unit (SPARU) sang New People’s Army kasunod sang engkwentro batok sa mga miyembro sang 79th Infantry “Masaligan” Battalion sa Sitio Icugan, Barangay Minapasuk, Calatrava, Negros Occidental kahapon.
Sa interview sang Bombo Radyo kay 1st Lt. Dansan Camua, Civil Military Officer sang 79th IB, nagapatigayon sang security operation ang mga militar sa lugar matapos nakabaton sang reports nagikan sa mga concerned citizens tuhoy sa presensya sang mga Communist NPA Terrorists nga nagapatigayon sang extortion activities sa lugar.
Suno kay Camua, alas 5:19 sang kaagahon nagluntad ang engkwentro kag mataoos ang lima ka minutos nga pagbayluhanay sang luthang, nagwithdraw ang iban nga mga miyembro sang makawala nga grupo.
Nakit-an sang mga militar ang bangkay sang isa ka lalaki nga nabilin sa lugar kag gintumod ini ni Punong Barangay Johnny Guilot nga si John Rey Pahayahay, legal ang edad kag sa karun ginahibalo pa kun diin nagapuyo.
Siya ang ginaalegar miyembro sang Special Partisan Unit sang Northern Negros Front, Komiteng Rehiyon-Negros.
Suno kay Guilot, si Pahayahay ang nagapangrecruit man sang mga miyembro nga mag-upod sa iya grupo samtang nagapatigayon sang extortion activities nga nagatuga sang kahadlok sa mga pumuluyo.
Nakuha man sa encounter site ang isa ka calibre .45, isa ka .38 revolver kag mga subversive nga mga dokumento.
Wala naman sang may nasamaran sa bahin sang gobyerno.
Suno kay Camua, ginakalipay sang mga residente ang pagneutralized sa ginaalegar miyembro sang SPARU bangud magluwas sa nagapangayo-ngayo ang mga ini, nagatuga pa sila sang kahadlok sa mga pumuluyo.
