Nagdangat sa masobra 100,000 ang apektado nga indibidwal sa probinsya sang Negros Occidental bangod sa pagbaha tuga sang maulanon nga panahon nga dala sang hangin habagat nga ginpabaskog sang Tropical Depression Gener.
Sa interview sang Bombo Radyo Bacolod kay Negros Occidental Provincial Disaster Risk Reduction and Management Office Head Irene Bel Ploteña, santo sa ila monitoring kahapon, mas nagtaas ang numero sang mga apektado nga mga residente sa probinsya ilabi na sa sur nga bahin.
Suno diri, may yara na sang ginpa-evacuate sa Binalbagan, Hinobaan, Candoni, Kabankalan, Ilog, Cauayan kag Sipalay.
Sa ila nga report, as of 5:00 pm kahapon, 29,838 ka mga pamilya ukon 100,335 ka mga indibidwal ang apektado.
Ini ang ginalakipan sang 23 ka mga ciudad kag banwa kun sa diin 3,466 ka mga pamilya ukon 11,728 ka mga indibidwal ang yara na sa evacuation centers.
Apang, padayon nga nagasaka ang numero sang mga evaucees tubtob subong nga aga.
May nakastandby naman nga search water vehicle pananglitan nga may yara sang mangayo sang augmentation.
Panawagan ni Ploteña sa tanan nga mga pumuluyo nga kun may abiso sang pag-evacuate dapat nga magsunod na lamang kag magulu-aligmat sa palibot kag lakat sang panahon.
