Madamo na sang nabiktima ang suspect sang rice scam sa Barangay Robles, La Castellana, Negros Occidental.
Madumduman nga nagdangop sa ipa Bombo Ta Segment sang Bombo Radyo Bacolod ang negosyante nga si Geraline Jalasgo sang nasambit nga Brgy matapos nga mabiktima sang rice scam kun sa diin may gintanyag sa ila nga bugas ang mag suspect nga nagabalor sang P2,250 kada sako.
Maayo ang sample nga ginpakita, apang sang gintig-ang nila ini, natukiban nila nga old stock na ang bugas, malain ang baho kag sa ibabaw lamang sang sako ang maayo.
Sa interview sang Bombo Radyo kay alyas ‘Roy’, residente sang nasambit nga lugar, posible nga grupo kag may mga bodega sang bugas ang nasambit nga mga suspect.
Samtang, ginpahayag naman ni Police Major Romulo Gepilango, hepe sang La Castellana Municipal Police Station nga nagreport na sa ila si Geraline Jalasgo nga nabiktima sang rice scam.
Suno kay Gepilango, wala pa sila sang impormasyon kun may mga bodega gid man ang mga suspetsado.
Dugang pa sini, posible man nga madamo na sang nabiktima ang mga suspetsado.
Padayon ang ila imbestigasyon sa pagtumod sang mga ini.
Pahanumdom sini sa publiko nga tsekyaron gid ang kalidad sa ginabakal ilabi na kun sako nga bugas agud malikawan nga mascam.
