12 percent na lamang ang nabilin nga wala nahatagan sang kuryente sa bilog nga franchise area sang Negros Electric and Power Corporation (NEPC).
Sa interview sang Bombo Radyo Bacolod kay Engr Leomel Tambanillo, assistant vice president for planning and business operation sang Negros Power, 88 percent na ang naenergized kag ang nabilin nga 12 percent amo ang mga isolated areas nga mabudlay kun sudlon kaangay sa Purok Lunao, Brgy Ma-ao nga may yara sang naguba nga taytay nga indi maagyan.
Suno diri, napahibalo na ang Local Government Unit sang ciudad sang Bago nga mabudlayan sila sa pagrestore sang kuryente.
Samtang, sa bahin naman sang ciudad sang Bacolod, may yara na lamang sang 5 to 6 percent nga wala sang kuryente apang ini nagadangat pa sa kapin 8,000 ka mga consumers nga apektado.
Pahayag ni Tambanillo, ginasiguro gid nila nga safe ang pagtrabaho sang mga linemen agud indi sila mabutang sa risgo kasubong man ang publiko.
Samtang, nagpaandam naman ini nga indi magtandog sa mga kuryente nga makita kag kabigon ini permi nga live wire.
Ini matapos nga makuryente ang Barangay Tanod sang Brgy Bata samtang nagapatigayon sang clearing operation.
Ang Brgy Tanod, yara sa karun sa ICU kag kritikal ang kondisyon.
