Nakabaton sang impormasyon ang Regional Drug Enforcement Unit sang Police Regional Office 6 nga isa lang ang supplier nga ginakuhaan ni Sofia Marie Dela Cruz sang shabu kag ang supplier nga ginakuhaan sang lalaki nga nakuhaan sang masobra P2 million nga shabu sa Purok Dalawidaw, Barangay 16, ciudad sang Bacolod sang Huwebes sang gab-i.
Sa interview sang Bombo Radyo kay RDEU chief Police Lt. Glenn Soliman, si Dela Cruz ang nagaserbe nga keeper sang illegal nga druga sa Negros Occidental kag ciudad sang Bacolod.
Ini ang konektado man sa subject sang buybust operation nga ginpatigayon sa ciudad sang Bago sang tinalikdan nga tatlo ka adlaw kag kay Lester Tindoc nga nadakpan sa Barangay 16 kun sa diin 300 gramos sang shabu ang narecover.
Suno kay Soliman, ini ang una nga kahigayunan nga nadakpan si Dela Cruz apang may nabaton sila nga impormasyon nga illegal drug personality man sa Bacolod ang amay sang duha niya ka bata nga nagtaliwan na.
Ang ginaupod sini subong suno kay Soliman ang ginapahayag nga naangot man sa illegal drug trade.
Indi pa matumod sang RDEU kun may grupo si Dela Cruz apang nagagwa nga may yara ini sang contact sa National Capital Region nga amo man ang source ni Tindoc sang illegal drugs.
Madugay na nga ginamonitor si Alyas Beauty suno sa RDEU chief apang nagsaylo ini sa ciudad sang Bago sang iya natiktikan nga mainit ang iya pangalan sa Bacolod.
Suno kay Soliman, nagaserbe sanday Dela Cruz kag Tindoc nga distributor sang illegal nga druga sa Negros Occidental.
