41 ang bag-o nga nagdugang sa kaso sang COVID-19 sa probinsya sang Negros Occidental samtang 30 naman ang nagdugang sa ciudad sang Bacolod kahapon.
Santo sa Department of Health Region 6 COVID-19 case bulletin no. 158, nakarecord ang Western Visayas sang 158 ka dugang nga mga kaso nga ginalakipan sang 66 sa Iloilo City, 41 sa Negros Occidental, 30 sa Bacolod City, 15 sa Iloilo Province, lima sa Capiz samtang isa naman ang sa Antique.
Sa 158 ka panibag-o nga kaso, 130 diri ang local cases, 22 ang mga locally stranded individual (LSI), lima ang returning overseas Filiinos (ROF) samtang isa naman ang authorized person outside residence (APOR).
Sa karun, may ara na sang kabug-usan nga 4,842 ka mga kaso ang narecord sa Western Visayas nga may 2,365 ka mga aktibo nga kaso.
Samtang 2,399 naman ang mga nakarecover sa pagdugang sang 92 kag nagdangat naman sa 78 ang numero sang nagtaliwan sa pagdugang sang duha.
Yara naman sa 76.96% ang asymptomatic sa kabug-usan nga kaso sang rehiyon.
Sa karun, ang kabug-usan nga kaso sa Bacolod ang nagdangat na sa 1,315 samtang ang kaso naman sa Negros Occidental ang nagdangat na sa 1,196.
Samtang, nagpagwa sang Executive Order No. 2020-39 series of 2020 si Himamaylan City Mayor Raymund Tongson Jr., nga nagamando sa pagbutang sa Barangay Aguisan, Barangay Saraet kag Sitio Punta Talaban sa idalom sang strict public health safety protocol epektibo subong nga adlaw, Setyembre 2 tubtob 15 bangud sa virus.
