Aminado ang pinuno sang Office of the Buidling Official nga wala sila sang ideya kun ano ang tinutuyo sang nagtago sang salakyan sang ciudad nga madugay na nga ginapangita nga nakit-an sa Purok Isla, Barangay Villamonte, Bacolod City kahapon.
Lima ka empleyado sang Bacolod City government ang gindagdagan sang show cause order may kaangtanan sa ginaalegar nadula nga mga salakyan sang syudad.
Sa lima ka empleyado, tatlo ang nagatrabaho sa Office of the Building Official.
Suno kay Engr, Isidro Sun Jr., sa iya pagkahibalo ang duha ka motorsiklo ang ginkawat samtang ang isa naman ka salakyan ang gintago.
Nakit-an ang salakyan sa area sa Purok Isla, Barangay Villamonte, Bacolod City nga yara sa sulod sang residence sang isa ka traffic enforcer nga nagatrabaho sa Bacolod Traffic Authority Office.
Apang, sang nakita ni Sun ang salakyan, daan na ini, wala na sang isa ka goma, wala na sang wiper, ginalumotan apang bag-o kun tulokon ang plate number.
Wala sang ideya si Sun kun ano ang tuyo sa pagtago sang salakyan nga madugay na nga ginapangita apang wala ginpagwa.
Wala man ini nakahibalo kun paano nagkadto ang salakyan sa kamot sang BTAO.
Nahaw-asan na ang isa sa lima ka empleyado sang Bacolod City government nga gindagdagan sang show cause order may kaangtanan sa ginaalegar nadula nga mga salakyan sang syudad.
Suno kay Engr Brian Javellana, nagatrabaho bilang staff sang Office of the Buidling Official, pagdeklarar ni Bacolod City Mayor Alfredo Albee Benitez nga iuli ang salakyan, wala ini nakahibalo kun diin niya ini pangitaon.
Ang salakyan nga nadula ang naka-memorandum of receipt sa pangalan ni Javellana.
Pahayag ni Javellana, sa karun bangod naretrieve na ang ini nga salakyan sa Purok Isla, Barangay Villamonte, Bacolod City, may yara na ini sang katawhayan sa paminsaron.
Samtang, suno naman kay Joery Jay Castellano, pinuno sang Management Audit Service Office, nga isa man sa gindagdagan sang show cause order, matapos ini maghalin bilang supervisor sang Vendors Palza sang tuig 2006, wala sini gindala ang motorsiklo sa bag-o sini nga opisina.
Iya man kun tani tinutuyo nga maghuman sang affidavit nga mag tunover sang motor apang bangod sa tuman ka kasakoon sa trabaho, wala na ini niya nahuman.
Suno kay Castellano, pagsalin sini sa iya bag-o nga designated office, wala niya gindala ang motor bangod nga ginagamit pa sa Vendors Plaza.
