Nadulaan sang kabuhi sa 7.7 magnitude nga linog sa Myanmar, malapit na magdangat sa 3,500

Nagdangat na sa malapit 3,500 ka mga persona ang nadulaan sang kabuhi bangud sa pagtay-og sang magnitude 7.7. nga linog sa Myanmar sang Marso 28.

Sa karun nagapadayon pa ang relief efforts sang mga rescuers apang nagapangatubang ang mga ini sang kabudlayan bangud sa pag-ulan.

Suno sa state media sa military junta-led country, ang linog ang nagtuga sang kamatayon sang 3,471 ka mga persona samtang 4,671 ang pilason kag 214 ang nagapabilin nga missing.

Kalabanan sa mga residente sa karun ang nagatulog sagwa sa mga tents.

Nagdugay ang pag-ulan sang kapin 45 ka minutos sang Sabado kag nagkalabasa ang mga pumuluyo kasubong man ang ila mga gamit bangud sa kakulang sang tarpaulins.