BACOLOD CITY-Patay ang isa ka nag-AWOL (Absence Without Leave) nga pulis sa pagpangluthang sa ciudad sang Bacolod sini lamang nga hapon.
Ginkilala ang biktima nga si Patrolman Eric Alcosaba nga assigned anay sa Bacolod Police Station 7.
Sa interview sang Bombo Radyo Bacolod sa commander sang Police Station 4 nga si Police Major Renante Jomocan, duha katuig nga nag-AWOL sa serbisyo ang pulis bangud wala ini nag-report sa iya pinakaulihi nga assignment sa Mindanao.
Suno pa kay Jomocan, ginakumpirmar pa nila ang impormasyon nga imbulbado sa iligal nga druga ang biktima rason nga ini ang ginsaylo sa Mindanao.
Pasado alas-3:00 sang hapon sang ginluthang ini sa guwa sang isa ka fastfood chain sa Burgos-Circumferential Road, Brgy. Villamonte.
Suno pa sa station commander, yara pa sa iya pick-up ang biktima sang ginluthang ini sang mga suspetsado nga nakasakay man sa pribado nga salakyan.
Nakaguwa pa man sa iya salakyan ang biktima antes ini ginbawian sang kabuhi.
Makita naman sa crime scene ang 18 ka markings sa mga naglapta nga bala.
Sa karun nagapadayon pa ang imbestigasyon sang Bacolod Police Station 4 agud makilala ang mga suspetsado kag matumod ang motibo sa krimen.
