Arestado ang nag-absent without official leave (AWOL) nga katapo sang Philippine Army sa ginpatigayon nga drug buy-bust operations sa Bangga Akina, Barangay Tangub, Bacolod City kahapon sang kaagahon, September 19.
Ginkilala ang subject person nga si Alyas “Jiljil” Ibañez, 44 anyos, kag temporaryo nga nagapuyo sa Barangay 19, Bacolod City, High Value Individual kag wala sa listahan sang Barangay Anti-Drug Abuse Council (BADAC).
Sa interview sang Bombo Radyo Bacolod kay Police Lt Ildefonso Leonard, Deputy Station Commander sang Bacolod City Police Station 8, nagpatigayon sila sang drug buybust operation kag natigayon nga madakpan si Alyas Jiljil, isa ka AWOL nga suldado.
WATCH: https://www.facebook.com/share/v/1DFYkgyRD8/
Nakuha sa paghinakop sini ang apat ka elongated kag napulo ka dalagko nga heat-sealed transparent plastic sachet sang suspected shabu.
Ang suspected shabu ang nagabug-at sang 51 grams kag may standard drug price nga P346,800.
Si Ibañez ang nakahunong na sa Bacolod Police Station 8 kag mangatubang sang kaso nga paglapas sa Section 5 kag 11, Aricle II sang RA 9165 ukon Comprehensive Dangerous Drugs Act of 2002.
