Nagdangat sa masobra 29,000 ka mga indibidwal ang gin-evacuate sa ciudad sang Bacolod sa paglaslas sang bagyo Tino.
Kahapon nagpatigayon sang meeting si Bacolod City Mayor Greg Gasataya kaupod ang PrimeWater, Negros Power kag Department of Social Services and Development para ma-assess ang status sang ciudad matapos ang bagyo.
Suno kay Gasataya, 29, 658 ka mga indibidwal ukon 8,729 ka mga pamilya ang gin-evacuate bangod sa bagyo apang sa karun may yara na lamang sang 1,178 ka mga indibidwal ukon 346 ka mga pamilya ang nagapabilin sa evacuation center.
Suno diri, 302 tanan ka mga puno sa ciudad ang nagkalatumba kag 90 pa lamang ang napangkakas kag nahimos.
Bangod sini, wala anay sang day-off ang mga Job Order employees kag sila gin-assign sa nagkalain-lain nga area sa ciudad para magbulig sa clearing operations.
Sa problema sa tubig, suno sa alkalde nagabuligay ang PrimeWater, Bureau of Fire Protection kag ang opisina ni Bacolod City Lone District Congressman Alfredo ‘Albee’ Benitez sa pagprovide sang tubig kag pagpatigayon sang water rationing sa mga affected barangays.
Samtang, gin-athag naman sang alkalde nga ang pahayag sini nga marestrore ang kuryente sang Biyernes ang santo lamang sa pahayag man sang Negros Power.
Pahayag ni Gasataya, wala siya sang intensyon nga magbinutig ukon mang-into apang siya nagasandig lamang sa impormasyon man nga ginahatag sa iya.
