Nag-overheat nga ceiling fan ang natumod nga rason sang sunog sa Purok King Fisher A, Barangay 16, Bacolod City pasado alas-2:00 kaina sang kaagahon.
Sa interview sang Bombo Radyo Bacolod kay Fire Superintendent Jenny Mae Masip, Fire Marshal sang Bacolod City Fire Station, natumod nga nag-umpisa ang kalayo sa kwarto ni Gerald Arroyo, nga nagarenta sa ikaduha nga panalgan sang balay ni Florentino Sevilla.
Nahibaluan nga sa masami 24 oras nga ginapa-andar ni Arroyo ang ceiling fan bangud sa mapaang nga panahon.
Ginpahayag ni Arroyo nga kagab-i siya ang may ginkadtuan, kag napabay-an nga naga-andar ang electric fan, kag sa iya nga pagbalik, dako na ang kalayo.
Ang nasunog nga area ang nagalapad sang 450 square meter nga ginalakipan sang 10 ka totally damaged kag lima ka partially damaged nga balay.
Ang sunog ang gindeklarar nga third alarm sang Bureau of Fire Protection kun sa diin nagadangat ang kahalitan sa balor nga P675,000.
Sa pihak nga bahin, nakaangkon naman sang second degree thermal burns kag kabudlayan sa pagginhawa ang Purok President nga si Alejandro Tiad matapos matrap sa nagakasunog nga balay.
Suno kay Masip, kun wala mahingagaw rescue sang mga fire personnel, mahimo nga wala gid matabangan ang Purok President.
