Nagdangat sa 5,000 tubtob 7,000 ka mga pumuluyo lakip na ang mga estuyante ang nag-upod sa ginpatigayon nga Trillion Peso March sa ciudad sang Bacolod kadungan sa ika-40 nga anibersaryo sang EDSA People Power Revulotion kahapon, Pebrero 26.
Sa interview sang Bombo Radyo kay Florence Guzon, Secretary General sang Kabataan Partylist Negros, nangin madinalag-on ang ginpatigayon nila nga rally sang mga pumuluyo sang ciudad kag bug-os nga probinsya sang Negros Occidental.
Suno kay Guzon, ang kilos-protesta nga ila ginahimo ang nagapakita sang padayon nga pagtinguha nila agud ipakigbato kag ipabati ang ila nga tingog batok sa malapad nga kurapsyon nga ginaatubang sang pungsod.
Bangud suno diri, tubtob subong wala pa sa gihapon nasolusyonan ang mga krisis sa pungsod nga nagapabudlay man sa mga pumuluyo ilabi na sa mga kabataan.
Paathag sini nga halin pa sa pagpungko ni late President Ferdinand Emmanuel Marcos Sr., 40 na ka tuig ang nakaligad tubtob sa subong sang administayon ni President Ferdinand Marcos Jr. nagapadayon sa gihapon ang kurapsyon.
