Para sa political analyst nga si Atty Jomax Ortiz malapit na lang kag ma-anunsyar man si Naga City Mayor kag Former Vice President Leni Robredo nga magapapili ini bilang presidente sa 2028 elections.
Sa interview kay Ortiz, kasunod sa anunsyar ni Vice President Sara Duterte sang plano sini nga magpapili bilang presidente, na-alarma na ang pihak nga grupo kag ginakumbinse na si Robredo nga maghimo naman sang amo nga anunsyo.
Suno diri, matapos ang pagbisita ni President Ferdinand “Bongbong” Marcos Jr sa Naga City may yara sila sang patigayonon nga meeting para esturyahan kun bala mahulat pa sa Disyembre antes mag-anunsyar si Robredo sang plano ukon dapat timprano pa agud mabalanse ang sitwasyon.
Para kay Ortiz, batonon ni Robredo ang suporta ni Marcos para sa alliance kag financial purposes sa iya nga pagpapili.
Dugang pa sini, sa iya paglantaw mas dako ang tsansa ni Robredo nga magdaog bilang presidente bangod wala ini sang isyu sa korapsyon samtang nagapungko bilang bise presidente sadto apang si VP Duterte naman may yara na sa apat ka impeachment complaint.
