Ginareklamo sang mga residente sang Purok Katilingban Dos, Barangay Mansilingan, Bacolod City ang naga-leak nga water pipe sang Bacolod City Water District (BACIWA)- PrimeWater sa dalan kun maglabay sa taytay.
Sa Ipa-Bombo Ta! segment sang Bombo Radyo Bacolod, suno sa isa ka residente, humalin pa sang Disyembre sang nagleak ang tubig kag tubtob nga kapin lima ka bulan na ang naglabay wala sa gihapon nakay-o.
Suno diri, kun adlaw mahina ang ilig sang tubig apang kun gab-i kun madutay lang ang nagagamit sang tubig, makusog ang ilig sini.
Suno pa diri, sadto may guba na nga bahin sa dalan apang bangod permi na ini nga basa, nagahumok ini kag mas naglapad pa ang guba.
Kun kaisa may yara pa sang nagaka-aksidente nga mga nagabyahe sa motorsiklo bangod madanlog ang dalan.
Pahayag sini, halos adlaw-adlaw nagalabay man ang PrimeWater didto kag bisan ang barangay nagkuha na sang litrato apang wala sa gihapon nahatagan sang solusyon.
Suno sa residente sa lugar, iban nagaproblema sa kakulang sang tubig apang sa ila lugar gina-usikan lang ang tubig.
Samtang, gintinguhaan sang Bombo Radyo Bacolod nga makakuha sang pahayag gikan sa BACIWA kag PrimeWater apang wala sang may nagsabat.
