Ginpahayag sang Zero Waste Campaigner sang Negrosanon Initiative For Climate and Environment (NICE) nga ang maeksperyensyahan nga mabaho nga basura sa Barangay Felisa ang bangud sa wala ma-segregate nga basura.
Sang tinalikdan may yara sang Committee Conference nga ginpangunahan ni Bacolod City Councilor Homer Bais, Chairperson sa Committee on Environment and Ecology sa Sangguniang Panlungsod nagtambong man ang NICE apisar nga wala man sila nakahambal apang ginlakip ang mga ini sa nasambit nga aktibidad.
Suno sa pahayag ni Katherine Dela Cruz, ang mabaho nga basura sa Barangay Felisa nga nagikan sa sanitary landfill ang resulta sang mixed waste kuntani ang ginahaboy lamang amo ang residual waste.
Nalipay man ini nga ginpamatian man sang ciudad ang concerns sang mga residente sa Barangay Felisa nga nagapabutyag sang kabalaka sa sitwasyon sa karun sang sanitary landfill.
Ang cell number 4 ang napuno na kag natalana nga magasira sa Setyembre ukon Oktubre kag magasaylo na sa cell number 5.
Isa man sa ginpamangkot sang NICE kun may yara na sang Environmental Compliance Certificate (ECC) ang cell number 4 kag 5 kun sa diin didto natukiban nga wala pa.
Nagpasalig man si Bais nga naproseso na ang ECC para sa cell no.4 nga magasira sa Oktubre kag cell number 5 bangud indi ini maka-operate kun wala ang nasambit nga requirement.
