Ginahulat pa sang Cadiz City Police Station ang desisyon sang pamilya sang isa ka nurse kag isa ka manunudlo nga naga-angkasanay sa motorsiklo kag lunsay ginbawian sang kabuhi matapos nga nalapakan sang truck nga may karga nga tubo sa Cadiz City, Negros Occidental kahapon sang hapon kun magapasaka sila sang kaso batok sa driver sang truck.
Nahibaluan nga pareho nga padulong sa south direction ang 14-wheeler truck kag ang motorsiklo sang nagtuyo nga mag-overtake ang motorsiklo sa truck.a
Sa interview sang Bombo Radyo Bacolod kay Lt. Col. Robert Mansueto, hepe sang Cadiz City Police Station, ginpahayag sini nga naalang-alang ang motorsiklo bangud nga may yara ini nga sugata nga salakyan gani nagbalik ini sa iya nga lane apang na miscalculate sini ang truck rason nga nadulaan sang kontrol sa motorsiklo ang driver nga si John Paul Ladrillo gani natumba kag nagtabog ang motorsiklo sa shoulder sang kalsada samtang nabilin naman sa dalan ang driver kag ang angkas sini nga si John Eurich Depasupil kag ginlapakan sang truck.
Dead on the spot si Depasupil samtang dead on arrival naman sa Manapla District Hospital si Ladrillo.
Nahibaluan nga ang 30-anyos nga driver sang motorsiklo ang isa ka nurse sa Cadiz District Hospital samtang ang angkas naman ang isa ka manunudlo sa Vicente Patricio Memorial Elementary School sa Barangay Magsaysay, Cadiz City.
Suno kay Mansueto, boluntaryo nga nagsungka sa Cadiz City Police Station kagab-i ang driver sang truck nga si Mario Bendevel sang Barangay Malasibog, Escalante City.
