Amat-amat na nga nagadamo ang manugbakal sang palupok sa Firecrackers Zone sa Reclamation Area apang nagalaum ang mga manugbaligya sang palupok nga magdagsa pa gid ang ila mga costumer tatlo ka adlaw antes ang pagsug-alaw sang bag-ong tuig.
Sa interview sang Bombo Radyo kay Melchor Deriada, board officer sang Bacolod Fireworks Vendor Association, sa karun makaginansya na sila sang supesyente apang ginaluaman sini nga mas magdamo pa gid ang ila nga costumer humalin bwas Disyembre 29 tubtob Disyembre 31.
Suno diri, kalabanan sa ginabakal sa ila ang triangle kag pasirit para man sa safety sang mga kabataan.
Sa fireworks naman, bangod nga kalabanan mahal ang presyo, madamo sang nagabakal nga nagapili sang barato apang may yara man sang nagabakal sang mga dalagko nga fireworks.
Kalabanan naman sa nagabakal amo ang ila mga suki nga costumer kag posible naman nga mas madamo sang sari-sari nga costumer ang magabakal sa ila, tatlo ka adlaw antes ang bag-ong tuig.
Pahayag ni Deriada, wala naman sila nagpadugang pa sang supply nga sa karun ila nalang ginapaubos ang ila mga baligya.
Nagpasalig man ini nga wala sila nagabaligya sang mga ginadumilian nga mga palupok.
Samtang, yara man ang Bureau of Fire Protection- Bacolod nga adlaw-adlaw nga nagatsekyar sa Firecrackers Zone.
Ang 63 ka mga stall sa Firecrackers Zone sa Reclamation Area naga-umpisa magbaligya alas- 9:00 sang aga tubtob alas-10:00 sang gab-i apang may yara man sang nagabligya tubtob alas- 12:00 sang kaagahon.
