Indi na magabaligya ang market vendor sa Burgos Public Market matapos nga ini ang mahatagan sang warning ticket sang madakpan nga nagabaligya sang refilled butane sa joint inspection sang Business Permit and Licensing Office, Bacolod City Legal Office kag Bacolod Police Station 4.
Sa interview sang Bombo Radyo Bacolod kay Leo Larlos, duha ka bulan palang siya nga nagabaligya sang refilled butane.
Ginadul-ong lamang sang supplier ang butane sa merkado kag wala man ini nakahibalo nga bawal.
Ginakuha sini ang supply P20 kada isa kag ginabaligya sa balor P22.
Gani natingala ini kaina nga may ginpatigayon nga inspection kag ginpangkumpiskar ang ila baligya.
Pahayag sini nga indi na siya magliwat sa pagbaligya sang butane, kag magafocus na lamang sa iban nga mga produkto.
Magasunod man ang vendor sa Burgos Public Market kun pagadumilian sang Bacolod City Goverment ang pagbaligya sang butane cannisters.
Nahibaluan nga sa pagtsekyar sang City Legal Office, wala sang rehistrado nga refilling company sa ciudad sang Bacolod.
Magapatigayon man sang inspection kag monitoring ang City Legal Office kaupod ang Business Permit and Licensing Office kag Bureau of Fire Protection- Bacolod sa mga merkado agud ma-identify ang nagabaligya kag kun diin ginakuha ang supply.
Ini matapos madamo sang nagluntad nga mga sunog nga bangod sa naglupok nga mga butane cannisters.
Sa interview sang Bombo Radyo Bacolod kay Beverly Fernandez, vendor sa Burgos Public Market, tag P22 ang ila nga pagbaligya sang butane canister, apang ini ang dapay bayluhan ang basiyo.
Siya ang nagakuha sang supply gikan sa ginkilala lamang sini nga sanday Cherry kag Joey kun sa diin nagakuha ini sang isa ka sako sang butane sa balor P1,400 nga iya mapaubos sa sulod sang isa ka adlaw ukon isa ka adlaw kag tunga.
Ang isa ka sako ang naga-unod sang 70 ka butane cannister samtang P2 naman ang ginansya sini sa kada isa.
Dugang pa ni Fernandez nga madamo man sila nga nagabaligya sang butane sa Burgos Public Market.
Apang panindugan sini nga sa tion nga may sungaw ang butane canister, ini ang nagasirit, kag ila naman ini nga ginabalik sa supplier.
Samtang indi naman mabalik sa ila ang may sungaw nga butane canister bangod ini ang ginadispose naman sang supplier.
Aminado si Fernandez nga wala ini sang mahimo kun ipatuman gid man sang Bacolod City Government ang pagban sa pagbaligya kag ini ang magasunod na lamang.
