Mas ginpasanyog pa sang French authorities ang pagdakop sa mga nagabaligya sang peke nga merchandise para sa nagahilapit nga Paris Olympics.
Ini agud nga masiguro nga wala sang fake Olympic merchandise nga mabakal ang gina-ekspektaran nga linibo nga mga fans nga magapadulong sa France.
Nakaligad lamang nga adlaw sang ginpasira ang mga stores nga nagabaligya sang peke nga mga produkto sang mga sikat nga brands kun sa diin nagdangat sa 63,000 ka mga bayo, sapatos kag leather goods ang nakumpiskar sang mga kapulisan kag naaresto ang napulo ka mga tawo.
Suno sa International Olympic Committee (IOC), kalabanan sa mga produkto nga ginapeke amo ang mga bayo kag mga items nga may disyenyo sang olympic mascot.
Suno sa European Union Intellectual Property Office, dako nga negosyo ang Fake fashion kag ini ang naghatag sang masobra bilyones nga kapierdehan sa mga kompanya.
