Indi na magpasaka sang kaso ang pamilya sang nagabusong nga babayi nga napatyan sang lapsag sa taguangkan sini matapos maigo sang stray bullet Purok Zone-4, Barangay VF Gustilo, Cadiz City, Negros Occidental.
Ginkilala ang biktima kay Marles Baja, 34 anyos, single, laborer, Filipino, 8 months pregnant, kag residente sang Purok Zone-4, Barangay VF Gustilo, Cadiz City Negros Occidental.
Sa interview sang Bombo Radyo Bacolod kay Police Lt. Lovella Cordova, Deputy Chief of Police sang Cadiz City Police Station, ginpahayag sini nga wala na nagpasaka sang kaso ang pamilya sang napatyan sang lapsag sa suspek apang ini ang nagapangatubang na sang kaso nga nga paglapas sa RA 10591 ukon “Comprehensive Firearms and Ammunition Regulation Act.
Suno kay Cordova, bangud sa stray bullet napatay ang lapsag sa tiyan sang iloy apang ang iloy ang estable na sa karun ang kondisyon.
Kamagulangan kuntani nga anak sang mag-asawa ang lapsag nga napatay samtang ang suspek ang abyan lamang sang live-in partner sang biktima.
Ginalantaw sang mga kapulisan nga mahimo nga nagpangkalag-kalag ang biktima gani nagpadulong ini sa balay sang iya utod kun sa diin na-igo ini sang stray bullet.
Bangud indi na magpasaka sang kaso ang pamilya sa suspek ginpapasa ang mga ini sang affidavit of no interest samtang ang suspek ang nakahunong sa Cadiz City Police Station bangud sa ginapangatubang nga kaso sa illegal possession of firearms.
