Nagapadayon ang contact tracing sa mga napalapitan sang 69 anyos nga pasyente nga nagpositibo sa coronavirus disease 2019 (COVID-19) sa ciudad sang Bacolod.
Madumduman nga ginpahibalo si Bacolod City Mayor Evelio ‘Bing’ Leonardia kagab-i nga ang 69-anyos nga residente sang Barangay Villamonte, Bacolod City nga nagtaliwan sa Corazon Locsin Montelibano Memorial Regional Hospital sang Abril 9 ang nagpositibo sa coronavirus disease 2019 (COVID-19).
Ang nasambit nga pasyente ang gin-admit sa CLMMRH bangud nagasuprer ini sang diarrhea.
Sa interview sang Bombo Radyo Bacolod kay Vice Mayor El Cid Familiaran, ginkompirmar sini nga nga nagapuyo sa Purok Sabis, Villamonte ang nagtaliwan nga pasyente.
Ang pasyente ang nag-abot sa emergency room sang regional hospital sang Abril 9 alas-2:30 sang kaagahon.
Ini ang naadmit sa ward alas-6:30 sang aga apang makaligad ang 30 minutos, ini ang nagtaliwan.
Antes naadmit ang 69-year-old male patient, duha na ka adlaw nga nagasufrer ini sang diarrhea kag moderately dehydrated naman.
Kasunod sang laboratory test result kahapon, gilayon nga ginpatigayon ang rapid test sa 17 ka mga staff sang CLMMRH nga nag-atender sa pasyente kag nagpositibo diri ang female nurse nga nagabusong sang tatlo ka bulan.
Apang wala ini nagakahulugan nga positibo na sa COVID ang nurse tubtub maggwa ang confirmatory test result nagikan sa sampe nga ginpadala sa testing center sa Iloilo.
Ginatugyan na lamang ni Familiaran sa barangay officials ang pagseal-off sang lugar kun sa diin nagapuyo ang pasyente.
